Машката репрезентација на Македонија до 20 години паралелно со А националниот тим ги одработува подготовките во Крушево, пред премиерното учество во Зонските квалификации за Европското првенство во 2027 година.
Селекторот Јован Шапе засега нема проблеми со составот, а младите репрезентативци работат напорно и максимално посветено на тренинзите. Можноста да се соочат со своите врсници од соседните земји претставува дополнителен мотив за македонските надежи.
Иако се свесни дека пред нив е тешка задача и силна конкуренција, атмосферата во репрезентацијата е позитивна. Младите фудбалери веруваат во своите квалитети и со голема желба го очекуваат првиот историски настап во Зонските квалификации.
„Одлична шанса за оваа генерација да игра за првпат во едни квалификации за Европско првенство. Поголем дел од играчите се знаеме меѓусебе од ланскиот настап на ЕМОФ и имаме одлична атмосфера во екипата. Добро се подготвуваме и се надеваме дека ќе ја оправдаме можноста која ни се дава“ – вели Драган Ставрев, капитен на селекцијата.
Дел од одбојкарите од генерацијата до 20 години се најдоа на поширокиот список на селекторот на сениорската репрезентација на Македонија, Јошко Миленкоски и одработија еднонеделни подготовки во Крушево, во мај годинава кога А тимот се подготвуваше за учеството во Европската лига 2026. Од нив Митко Спасов доби шанса и да настапи за сениорскиот национален тим, а сега тоа искуство ќе го пренесува меѓу надежите.
„По одличното искуство со А репрезентацијата се враќам меѓу моите врсници, каде се надевам дека ќе успеам да пренесам дел од работите кои ги научив со сениорите. Мојата генерација сметам дека има голем потенцијал и квалитет, а шансата да играме едни евро-квалификации ќе ни овозможи да созрееме како екипа. Подготовките течат во најдобар ред и сите сме мотивирани во најдобро светло да се покажеме во квалификациите“ – истакнува средниот блокер Митко Спасов.
Нашата репрезентација во Зонските квалификации кои ќе се играат од 25 до 29 август во Софија, ќе се соочи со домаќинот Бугарија, Србија, Турција, како и Русија и Белорусија, кои се вклучени во БВА квалификациите по тргнувањето на забраната за меѓународен настап на овие селекции.
