ГФК Тиквеш продолжува со засилувањето на играчкиот кадар за новата сезона, а најново име во редовите на кавадаречкиот прволигаш е 20-годишниот Мухамед Елмас.
Елмас во Тиквеш пристигнува од редовите на Македонија ЃП, а во досегашната кариера има настапувано и за Работнички и Гостивар. Станува збор за млад и перспективен фудбалер, кој во Кавадарци доаѓа со желба за нов предизвик и можност за дополнителен развој.
Дваесетгодишниот фудбалер зад себе веќе има искуство во македонскиот фудбал, а трансферот во Тиквеш ќе биде нова можност за него да се наметне во тимот и да покаже дека може да биде важен дел од составот.
Од клубот истакнаа дека Елмас е млад, амбициозен и мотивиран, со јасна желба да се докажува и да напредува, но и да даде свој придонес во амбициите на Тиквеш во новата сезона.
Со ангажманот на Елмас, кавадаречкиот клуб продолжува да го формира составот со комбинација од искусни и млади фудбалери, кои треба да одговорат на предизвиците што ги носи новата сезона.
Во првите две кола Тиквеш има одличен старт со 2 победи над Арсими и Башкими.
