Од петок до понеделник ќе се одигра осминафиналето од футсал Купот на Македонија. Познати се двојките за осминафиналето кои ќе се соочат за следна фаза од Купот односно пласман во четвртфиналето.
Второлигашот Кратово на домашен терен ќе игра против прволигашот Железарец. Домаќинот веќе се мобилизира со навивачи кои ќе ја исполнат Градската сала во Кратово, голманот и капитен Зоран Јакимовски е успешно опериран, а тоа ќе биде уште една причина салата да се исполни и од трибина да се испрати силна порака до Јакимовски за негова успешна рехабилитација, а Кратово сака следна фаза од Купот.
Бутел ќе има претешка задача откако налета на освојувачот Форца, со што тимот на Форца ќе биде голем фаворит во оваа прволигашко Куп соочување.
Партизан Југ од Брвеница ќе игра со тимот на Победа од Прилеп, ова всушност ќе биде второлигашки дуел, додека пак прволигашот Црна Река од Кавадарци како фаворит ќе патува во Штип, каде ќе се соочи со есенскиот шампион во Втората лига, тимот на Мал Ајакс.
Кораби ќе игра дома против прволигашот Шкупи, со што фаворитската улога е на страната на гостинот, а пак Јувентус Серава и Клими ќе играат прволигашки дуел.
Осогово во Крива Паланка ќе игра дерби против Проект, ова ќе биде можеби и најнеизвесниот осминафинален дуел каде два квалитетни прволигаши ќе се судрат меѓусебно.
Амбициозниот тим на Балкан кој најавува борба за влез во Првата лига во осминафиналето од футсал Купот ќе се соочи со прволигашот Кеги Моби од Велес.
