Македонското џиу-џицу доби уште една голема причина за гордост. Катерина Ацевска испиша нова страница во историјата, откако на Светското првенство во Абу Даби се избори за сребрениот медал и титулата светска вицешампионка.
За Ацевска ова е чекор погоре во однос на нејзиниот настап на претходното Светско првенство во Тајланд, каде што освои бронзен медал. Со новиот голем резултат, македонската натпреварувачка уште еднаш потврди дека припаѓа во самиот врв на светската џиу-џицу елита.
Одличниот настап во Абу Даби ѝ носи и нови бодови на Светската ранг-листа, а според информациите од федерацијата, Ацевска сигурно ќе го задржи првото место во својата категорија. Особено импресивен е фактот што таа сè уште е најмлада натпреварувачка во својата категорија, а веќе се искачува на самиот светски врв.
Зад овој успех стои огромна работа и жртва. Целото лето Ацевска го помина во напорни тренинзи, а вложениот труд сега дојде до израз на најголемата светска сцена.
Од федерацијата информираат и дека во една од борбите, против претставничката на Монголија, Катерина доживеала помала повреда на рамото, но за среќа не станува збор за сериозна повреда. Селекторот по настапот испрати кратка и емотивна порака:
„Фала му на Бога успеавме. Доживеавме мала повреда во борбата со Монголија но за среќа нее сериозна. Катерина на нивото на својата задача. Останува да ги анализираме борбите, посебно двете изгубени. Утре ќе можам пред Федерацијата да дадам целосен преглед на сите борби.“
Од федерацијата упатија искрени честитки до Ацевска за големиот резултат и за целата жртва вложена на патот до светското сребро.
Катерина Ацевска сега има светско сребро, лидерска позиција на ранг-листата и уште една потврда дека иднината на македонското џиу-џицу е во сигурни раце.
