На терените на ТК Југ се одржува младинскиот тениски турнир „Neocom Open 2026“, од категоријата Ј60, а титулите во конкуренција на двојки ги освоија Сара Митевска и Андреја Глушкова од Бугарија, односно македонскиот тандем Кристијан Јанев и Ерион Незири.
Митевска и Глушкова, како први носителки, одиграа убедливо финале и со 2:0 во сетови (6:0, 6:1) ја совладаа комбинацијата Стилиани Нуцу од Грција и Антонија Станевска од Бугарија. Со тоа само ја потврдија фаворитската улога која ја имаа пред завршницата.
Кај момчињата финалето донесе многу поголема неизвесност. Јанев и Незири загубија во првиот сет, но успеаја да направат пресврт и со 2:1 (4:6, 6:4, 10:6) да ги победат првите носители Албин Колет од Франција и Диего Вагнер од САД.
Денеска ќе се комплетира програмата со финалните натпревари во поединечна конкуренција. Во машкото финале ќе играат Матја Путиќ од Србија и Диего Вагнер од САД, додека кај девојчињата силите ќе ги одмерат Арина Фомина од Русија и Сара Козма од Романија.
„Neocom Open 2026“ е вториот од петте младински турнири кои годинава се одржуваат во Скопје. Во исто време, веќе започнаа и квалификациите за наредниот турнир од програмата – „Југ Опен 2026“.
