Струга Трим Лум на одличен начин ја отвори новата сезона во Првата лига, со убедлива победа од 3:0 против Шкендија Арачиново, која годинава обезбеди пласман во елитата.
Стружани и во второто коло ќе имаат дуел со нов прволигаш. На спротивната страна ќе биде Скопје, кој исто така оваа сезона пристигна од Втората лига.
„Против Скопје, како и на секој друг натпревар, мора да излеземе на теренот и да го дадеме најдоброто од себе. Кога велам најдоброто, мислам на тоа сите ние прецизно да ги реализираме задачите што ни се дадени од стручниот штаб. Ако успееме да го направиме тоа, тогаш верувам дека добро ќе поминеме на ова гостување во Скопје“, изјави Бесмир Бојку.
Тој е свесен дека повеќе нема лесни натпревари во ПМФЛ , па затоа стружани во ниеден момент не смеат да го потценат тимот на Скопје.
„Нема веќе лесни натпревари, воопшто не ни беше лесно ниту против Шкендија Арачиново, без оглед на конечниот резултат. Би сакал да повториме таква игра, со единствена цел да продолжиме по победнички пат“, истакна Бојку.
Натпреварот меѓу Скопје и Струга Трим Лум се игра денеска, со почеток од 17:00 часот, на комплексот на Фудбалската федерација на Македонија.
