Македонската кадетска репрезентација пружи добар отпор во првото полувреме, но Хрватска во продолжението го презеде целосниот контрола врз натпреварот и на крајот славеше со убедливи 112:57.
Иако хрватската селекција ја имаше фаворитската улога, македонските кошаркари уште од самиот почеток покажаа голема борбеност и желба за надигрување. Во првата четвртина Македонија беше рамноправен противник, а по десет минути игра Хрватска водеше со 21:15.
Хрватите подобро го започнаа вториот период и со серија од 5:0 стигнаа до првата двоцифрена предност – 26:15, по што следуваше тајм-аут на македонскиот селектор Дејан Стојановски.
Во продолжението Хрватска успеа да ја зголеми разликата до 40:18, но Македонија реагираше и покажа карактер. Предводена од расположениот Дион Шабани, нашата селекција возврати со серија од 7:0 и намали на 40:25.
До паузата Македонија продолжи да ја топи негативата, па на полувремето хрватската предност изнесуваше 46:33.
Сепак, во второто полувреме следуваше целосно поинаква слика на теренот. Хрватска влезе многу подобро и со серија од 10:2 повторно направи поголема разлика, стигнувајќи до 56:35.
Од тој момент хрватските кадети целосно го диктираа темпото и постепено ја зголемуваа предноста. Македонија не успеа да го задржи ритамот од првото полувреме, па Хрватска на крајот стигна до високи 112:57.
Најдобар стрелец кај Македонија беше Дион Шабани со 16 поени и 8 скока, додека Котевски натпреварот го заврши со 10 поени.
По овој натпревар, македонските кадети денес ќе имаат слободен ден, а во понеделник ги очекува нов предизвик. Од 18:30 часот во салата „26. Април“ во Гевгелија, Македонија ќе се соочи со Швајцарија, во натпревар во кој ќе ја брка втората победа во групата „Б“.
