Третолигашот Свети Троица од Охрид преку соопштение информираше за тешката повреда што ја претрпе нивниот капитен, Боге Бимбилоски.
37-годишникот доживеал фрактура на зглобот и скинати лигаменти, повреда која ќе го оддалечи од терените на неколку месеци.
Сепак, клубот не губи надеж, бидејќи Бимбилоски вчера успешно помина операција и започна со процесот на закрепнување. Со ова, клубот изразува своја поддршка и уверување дека капитенот ќе издржи и ќе се врати побрзо и посилен од претходно.
„Ја известуваме јавноста дека, нашиот капитен, Боге Бимбилоски, за жал, претрпе тешка повреда (фрактура на зглобот и скинати лигаменти), која ќе го оддалечи од терените неколку месеци. На наша радост, вчера успешно беше опериран, со што започна неговиот период на закрепнување. Како клуб, сега, повеќе од кога било, стоиме покрај него во неговото патување кон закрепнување и се надеваме на негово брзо и целосно враќање“, велат од охридскиот третолигаш.
Новајлијата во Трета лига – Југозапад есенскиот дел го заврши на деветтото место со 11 бодови на своето конто.
