Македонската ракометарка Сара Миновска имаше одлично деби за новиот клуб, откако левото крило веднаш по пристигнувањето во Словачка заигра за шампионот Јувента Михаловце.
Според информациите на Спортска Димензија, Миновска на 8 август пристигнала во Словачка, а веќе истиот ден го имала и првиот настап во дресот на новиот клуб. Поради административните процедури и документацијата, македонската интернационалка добила ограничена минутажа од само десет минути, но успеала да остави одличен впечаток.
Миновска постигна два гола од два обиди, односно дебито го заврши со максимални 100 проценти реализација.
За 23-годишната ракометарка ова е прв интернационален ангажман во кариерата. Во Јувента Михаловце, кој е актуелен шампион на Словачка, Миновска ќе има можност да се докажува и на европската сцена. Во клубот веќе настапува и македонската репрезентативка Теодора Дукоска.
Миновска во вториот дел од минатата сезона беше дел од Чаир, каде што пристигна од Металург Автокоманда. Претходно настапуваше и за Вардар, во периодот кога важеше за една од најперспективните македонски ракометарки на позицијата лево крило.
На репрезентативен план, Миновска има настапи за младинската и сениорската селекција на Македонија. Особено се истакна на ЕХФ шампионатот во Скопје во 2021 година, каде што беше избрана за најдобро лево крило на турнирот.
По првите десет минути и двата реализирани шута, Миновска на најдобар можен начин го најави своето прво интернационално поглавје.
