Скопје викендов ќе биде центарот на европското јуниорско џудо, откако во спортската сала „Јане Сандански“ од 8 до 9 август ќе се одржи Европскиот јуниорски куп, едно од најзначајните натпреварувања за млади џудисти на континентот.
На престижниот турнир ќе настапат вкупно 346 натпреварувачи од 34 држави, кои ќе се борат за медали, вредни ранкинг бодови и што подобар пласман на европската сцена. Се очекуваат возбудливи борби и силна конкуренција во сите тежински категории.
По завршувањето на натпреварувачкиот дел, од 10 до 12 август, ќе се одржи и меѓународен тренинг камп. Овој камп ќе им овозможи на учесниците да тренираат заедно со врвни европски џудисти, да разменат искуства и дополнително да ја подобрат својата форма и техника.
Организацијата на Европскиот јуниорски куп претставува уште една потврда дека Скопје успешно се позиционира како домаќин на големи меѓународни спортски настани, а љубителите на џудото ќе имаат можност во живо да ги проследат настапите на најталентираните млади натпреварувачи од Европа.
