Искусниот српски центар Димитрије Николиќ (28 години, 211 см) и официјално е нов кошаркар на МЗТ Скопје, откако денеска потпиша договор со актуелниот македонски шампион.
Николиќ зад себе има богато професионално искуство, настапувајќи за повеќе клубови во Србија и во странство. Кошаркарскиот пат го започна во Раднички од Крагуевац, а од 2017 до 2021 година го носеше дресот на Партизан. Потоа играше за Слога Краљево, Слобода Ужице, ФМП и Златибор, пред да ја започне интернационалната кариера во романска Крајова, каде што настапуваше во два наврати. Во меѓувреме беше дел и од романски Брашов, како и од литвански Невежис.
Со своето искуство, висина и физичка доминација, Николиќ треба да внесе дополнителна стабилност под кошевите и да биде значајно засилување за „штрковите“ и во нападот и во одбраната.
Србинот е четвртото странско засилување на МЗТ Скопје ова лето, по Американците Лесли Ворнер и Ноа Фарахан, како и босанскиот центар Емир Крајиниќ.
За новата сезона договори со клубот имаат и Дамјан и Војдан Стојановски, Андреј Маслинко, Андреј Андоноски, Лука Стојановски и Никола Василевски, а на тренерската позиција останува Васко Атанасов.
Во претстојната сезона МЗТ Скопје ќе се натпреварува во домашното првенство, АБА2 лигата и ФИБА Еврокупот.
