Дебитантот во Првата македонска фудбалска лига, екипата на Беса од Добри Дол го промовираше Бобан Бабунски како нов тренер, кој ќе биде дури трет на тренерското столче во овој клуб.
56-годишниот стратег кој во својата кариера ги има водено Пелистер, Вардар, Победа, Работнички, беше неколку натпревари и селектор на Македонија, како и прв асистент во Шкупи, сега ќе има нов предизвик со Беса.
Дебитантот сезоната ја започна со Александар Таневски, тренерот кој со Беса беше шампион во Втората лига и ја внесе Беса во Прва лига, потоа кратко дојде Берат Имери, но тој замина, а сега седнува Бабунски како кормилар на Беса.
„Задоволство ни е да објавиме дека постигнавме договор со познатиот тренер Бобан Бабунски. Веруваме дека ќе внесе позитивен дух и нова енергија во нашиот тим, помагајќи ни да ги оствариме нашите цели за новата сезона. ФК Беса му посакува добредојде и успех на тренерот Бабунски во нашиот клуб“, се вели во соопштението на Беса.
Беса се наоѓа во бараж зоната или на 10. место на прволигашката табела на своето конто има 13 бодови со учинок од три победи, четири ремија и 11 порази.
Пролетниот дел Беса го отвара во Охрид на „Билјанини Извори“ против Воска Спорт и тоа ќе биде всушност дерби од дното на табелата.
