Фудбалскиот клуб Пелистер ги започнува подготовките за новата сезона 2026/2027 со амбициозна програма за својата младинска школа. Во претстојниот подготвителен период, младите „зелено-бели“ ќе имаат можност да стекнат драгоцено искуство преку контролни натпревари и настапи на домашни и меѓународни турнири против реномирани противници.
Младинските категории на битолскиот клуб ќе ги одмерат силите со познати клубови и академии како Панатинаикос, Хапоел Хаифа, Макаби Петах Тиква, Вардар, Работнички и Брегалница, а на програмата се и дуели со репрезентацијата на Македонија (генерација 2010). Дополнително, ќе бидат одиграни и контролни средби против сениорските екипи на второлигашите Еуромилк и Новаци.
Посебно место во календарот има турнирот во Скопје, кој традиционално се организира во чест на Александар Пандовски – Панда. На овој силен турнир генерацијата 2008/2009 на Пелистер ќе настапи во исклучително квалитетна конкуренција заедно со Вардар, Работнички, Брегалница, репрезентацијата на Македонија (2010) и сениорскиот состав на Еуромилк.
Освен натпреварите во Македонија, младите фудбалери на Пелистер ќе учествуваат и на повеќе престижни турнири во Грција и Црна Гора, каде ќе имаат можност да се соочат со различни стилови на игра и да го продолжат својот фудбалски развој.
Од клубот истакнуваат дека овие натпревари и турнири се значаен дел од подготовките за новата сезона, со цел младите „зелено-бели бисери“ да стекнат нови искуства, да го подигнат нивото на својата игра и максимално подготвени да ги дочекаат предизвиците што ги носи сезоната 2026/2027.
