Фудбалскиот терен во штипската населба Чардаклија, каде традиционално се одржува Меморијалниот турнир во мал фудбал „Влатко Петров“, за првпат доби трибини, со што значително се подобруваат условите за следење на натпреварите.
Новите трибини ќе овозможат поголема удобност за верната публика, која со години е составен дел од турнирот, а воедно му даваат и поубав изглед на самиот спортски комплекс. Со ова се очекува и уште подобра атмосфера за време на натпреварите, што дополнително ќе придонесе за квалитетот на оваа традиционална спортска манифестација.
Од организацискиот одбор на Меморијалниот турнир „Влатко Петров“ истакнаа дека со поставувањето на трибините конечно се реализирала долгогодишната желба на сите кои се дел од турнирот.
„Ги информираме верните гледачи, поддржувачи на Влатко Петров турнирот и воопшто сите љубители на спортот дека од денес имаат значително подобрени услови за следење на натпреварите. Со поставување на трибините се заокружува една целина и дамнешна желба на сите нас кои сме дел од Влатко Петров турнирот со години наназад. Во оваа прилика сакаме да се заблагодариме на Општина Штип и градоначалникот Иван Јорданов како еден од генералните покровители на турнирот, но и за разбирањето, соработката и поддршката кои ни ги пружат.“
Поставувањето на трибините претставува значаен чекор во унапредувањето на инфраструктурата на теренот во Чардаклија и уште една потврда дека Меморијалниот турнир „Влатко Петров“ продолжува да расте и организациски да се развива, обезбедувајќи подобри услови и за учесниците и за бројната публика.
