Вечерва се игра големото спектакуларно финале на турнирот во мал фудбал „Конче 2026“ – најдобрите две екипи кои обезбедија пласман во големото финале ќе го имаат последниот предизвик до подигање на шампионскиот пехар.
Фреигхт Оне од Радовиш или кавадаречка Црна Река ќе биде победникот на овогодинешното издание на турнирот во општина Конче.
Двете екипи имаа повеќе од тешка полуфинале за пласман во големото финале. Екипата на Црна Река преку Перо и Тајфата стигна до пласман во финалето триумфирајќи со 3:2, но во продолжението.
Во регуларниот дел „тајфата“ го отвори резултатот, а потоа кавадарчани го свртеа резултатот на 2:1, но примија гол на неколку секунди до крајот за 2:2.
Во продолженијата двете екипи влегоа исцрпени со последни сили, а тука Црна Река успеа да постигна гол и со конечни 3:2 да се пласира во големото финале.
Во вториот полуфинале меч беше буквално како финале пред финале – Фреигхт Оне со 6:4 славеше над Дивино во вистинска драма.
Радовишани брзо постигнаа три гола што беше вистински шок за тимот на Дивино, а потоа Фреигхт Оне дојде и до 4:0 предност. До крајот на првиот дел популарните пици од Босилово стигнаа до 4:2, а тоа го принуди Фреигхт Оне да бара тајм-аут. До крајот на првиот дел резултатот не се промени.
Во второто полувреме Дивино успеа да постигна два гола предност за 4:4, а потоа имаше шанса и за пресврт, па мечот влезе во продолженија од двапати по пет минути.
Во меч каде се чувствуваше заморот и кај едните и кај другите Фреигхт Оне постигна два гола за предност од 6:4, што се покажа и конечен резултат.
Вечерва во 20:30 часот ќе има Настап на културно-уметнички друштва. Во 22 часот започнува мечот за трето место каде Перо и Тајфата ќе го предизвикува составот на Дивино, а пак од 23 часот започнува големото финале меѓу Црна Река и Фреигхт Оне.
Сите патишта водат кон Конче, каде покрај два спектакуларни натпревари, ќе можете да уживате во добра скара, ладно пиво и неверојатно одлични палачинки.
За сите вие кои нема да можете да бидете во Конче, натпреварите ќе можете да ги следите во живо на Спортска Мрежа преку директен пренос на YouTube каналот на Спортска Мрежа.
И годинава Спортска Мрежа е медиумски покровител на овој спортски настан, кој зад себе има огромна традиција и историја.
