Македонската машка кошаркарска репрезентација до 18 години продолжува со подготовките за претстојното Европско првенство, а првата проверка ја очекува утревечер против Косово.
По успешно одработената прва недела од подготовките, селекторот Миодраг Тодоровиќ и неговиот стручен штаб го намалија списокот на кандидати. Од првичните 30 кошаркари, во подготовките остануваат 16 играчи кои ќе конкурираат за настап на континенталниот шампионат.
По контролниот натпревар со Косово, младите македонски кошаркари ќе отпатуваат во Бугарија, каде ќе одиграат уште две пријателски средби како дел од завршната фаза на подготовките.
„Помина првата недела од почетокот на подготовките за Европското првенство. Започнавме со селективни тренинзи на кои имавме 30 кошаркари, а во изминатиот период бројката на присутни во тренажниот процес ја сведовме на 16. Во оваа почетна фаза фокусот ни беше ставен на физичката подготовка, како и на основните принципи и задачи во играта.
Веќе утре вечер ќе ја имаме и првата проверка, контролен натпревар против селекцијата на Косово. Неколку дена подоцна патуваме за Бугарија, каде се закажани уште две пријателски средби кои ќе ни послужат како важен дел од оваа средишна фаза од подготовките“, вели селекторот Тодоровиќ.
Македонските јуниори тренираат во малата сала на СРЦ „Кале“, каде секојдневно ги одработуваат тренинзите со почеток од 18 часот.
Во моментов во тренажниот процес вклучени се 16 кошаркари: Григориј Ѓорѓевиќ, Дамјан Данев, Жарко Терзиевски, Алексеј Нешовиќ, Дамјан Стојановски, Марко Бајалџиев, Ѓорѓи Цветковски, Дамјан Илиевски, Дамјан Стојаноски, Љубен Ефтимовски, Павел Ѓиновски, Лука Чучанов, Михајло Малиниќ, Филип Алексовски, Александар Сотир и Горазд Спасовски.
