Македонската одбојка има свои претставници меѓу официјалните лица на Европското првенство за девојки до 18 години, кое од вчера до 12 јули се одржува во Литванија и Летонија. Нашата земја ја претставуваат техничкиот делегат Симон Џинес и интернационалната судијка Елеонора Петровска.
Џинес и Петровска се ангажирани во групата Б, која се игра во литванскиот град Шијаулиаи. Како технички делегат на ЦЕВ, Џинес е задолжен за организацијата на сите натпревари во групата. За него ова е второ последователно Европско првенство во младинска конкуренција во оваа улога, а овој ангажман претставува и подготовка за Европското првенство во сениорска конкуренција, кое во септември ќе се одржи во Клуж, Романија.
Од друга страна, Елеонора Петровска дебитира на едно Европско првенство. Таа веќе ја имаше својата прва задача како втор судија на возбудливиот натпревар меѓу Германија и Бугарија, кој заврши со победа на Германките од 3:2 во сетови. Денеска, македонската арбитерка ќе ја има честа да биде прв судија на дуелот меѓу Финска и Франција.
На шампионатот настапуваат 16 репрезентации, поделени во две групи со по осум селекции. Двете најдобри екипи од секоја група ќе обезбедат пласман во полуфиналето, додека големото финале е закажано за 12 јули во Рига.
