Комисијата за натпреварување при ФФМ, на денешната седница отвори дисциплински постапки по случувањата од натпреварите во 30. коло од Првата МФЛ, сезона 2025/26.
На дуелот меѓу ФК Тиквеш 1930 и ФК Аресими 1973, одигран во Кавадарци на 3 мај 2026 година, евидентирани се сериозни инциденти од страна на домашната публика. Навивачката група „Лозари“ користела пиротехника, при што дури 38 пати биле фрлани пиротехнички средства на теренот. И покрај двете предупредувања преку разгласот, инцидентите не престанале. Дополнително бил истакнат и навредлив банер кон ФФМ, кој подоцна бил отстранет по интервенција на службените лица. Поради настаните е покрената дисциплинска постапка и случајот е предаден на Дисциплинската комисија на ФФМ.
На натпреварот меѓу ФК Силекс АД Кратово и ФК Шкендија АД Тетово, одигран на 1 мај 2026 година во Кратово, инцидентите се случиле по завршувањето на мечот. Фудбалерот на Шкендија, Имран Фетаи, оштетил врата во службените простории удирајќи ја со нога, за што е изготвен и полициски записник и земена изјава.
Исто така, шефот на стручниот штаб на Шкендија, Јетон Беќири, се однесувал некоректно кон припадници на МВР, упатувајќи вербални навреди во службените простории.
Поради овие случувања, Комисијата за натпреварување покрена дисциплинска постапка против Имран Фетаи и Јетон Беќири, кои се предадени на Дисциплинската комисија на ФФМ.
Дополнително, ФК Шкендија е задолжена во рок од 15 дена да постигне договор со ФК Силекс за надомест на причинетата штета и писмено да ја извести Комисијата за натпревари за регулирањето на обврската.
