Вардар ќе биде посилен со две искусни фудбалерки за продолжението од првенството во Првата женска фудбалска лига, откако „црвено-црниот“ дрес го облекуваат Елма Шемсовиќ и Иман Шљиво.
Шемсовиќ која има 27-години доаѓа од тимот на Истатов, а низ кариерата беше дел од Каменица Саса, Скопје и Борец од каде и ја започна кариерата.
Со своето искуство ќе биде важен адут за Вардар, а за новиот клуб Шемсовиќ веќе одигра три натпревари – против Пелистер го имаше своето деби, а потоа настапи и против Каменица Саса и Скопје односно против своите поранешни екипи, како и против Љуботен, во меч каде Вардар го освои првиот бод.
Шљиво е 25-годишна голманка, која доаѓа од екипата на Сараево од Босна и Херцегоивина, низ кариерата беше дел од Емина од Мостар и романска Олимпија Клуж.
Вардар по шест кола има пет порази и едно реми и со еден бод се наоѓа во долниот дел од табелата во ПЖФЛ, а против Тиверија Брера на домашен терен ќе ја бара и првата сезонска победа.
