Охрид продолжува да го засилува ростерот пред новата сезона, а по доаѓањето на Дино Славиќ, Доминик Мате, Никола Зечевиќ и Мартин Карапалевски, клубот добива уште едно звучно име.
Новиот член на тимот е Адама Кеита, леворако крило со богато европско искуство. Тој седум сезони го носеше дресот на францускиот гигант ПСЖ, а последната година и половина настапуваше за грчкиот АЕК Атина.
Кеита има 28 години и зад себе веќе има сериозни успеси на репрезентативно ниво – бил дел од младинските селекции на Франција и освоил бронзен медал на Светското првенство за младинци во 2017 година.
Во периодот поминат во ПСЖ, кога тимот го водеше Раул Гонзалез, тој освои дури седум титули во француското првенство, како и два трофеи во националниот Куп.
На левата крилна позиција, Охрид оваа сезона веќе располага со капитенот Гоце Ојлески и младиот Никола Ристески, па конкуренцијата таму дополнително се засилува со доаѓањето на Кеита.
Од клубот истовремено останува желбата да се задржи јапонскиот ракометар Косуке Јасухира. Тренерот на Охрид истакна дека би сакале тој да остане дел од тимот, нагласувајќи дека се работи за играч кој има договор со клуб од Кувајт, но кој во последните натпревари покажал колку е важен за составот. Сепак, признава дека неговото останување нема да биде лесно за реализација.
