Екипата на Младост одигра натпревар за паметење во 24. коло од Првата ракометна лига, откако со убедливи 60:24 го декласираше составот на Шампион. Домашниот тим доминираше од самиот почеток, што го потврдува и резултатот на полувремето од 30:9.
Прашањето околу победникот беше решено уште во првиот дел, по што во второто полувреме тренерот на Младост им даде шанса на помладите ракометари. На теренот настапија и кадетите, како и двајца пионери – Иванџиков (14) и Лукиќ (13), кои не само што добија минутажа, туку успеаја да се запишат и во листата на стрелци, потврдувајќи дека клубот има светла иднина.
Најефикасен во редовите на Младост беше Ѓорѓе Атанасов со 12 постигнати голови, додека Стамен Гогов додаде осум, а Душан Каркалашев седум реализации. Кај гостите од Шампион, најрасположен беше Давид Јовчевски со десет погодоци.
Ова е најубедлива победа за Младост во пролетниот дел од сезоната, а воедно и најефикасен натпревар, со оглед на тоа што тимот постигна дури 60 голови – бројка која ниту една екипа не ја достигнала оваа сезона во Првата лига. Иако во есенскиот дел Младост оствари повисока разлика (победа од 44 гола против Кичево), овој натпревар влегува во историјата како најголема голгетерска претстава.
Средбата имаше и хуманитарен карактер. Сите средства собрани од продажбата на влезници беа донирани за малата Ника, која во наредните денови треба да замине на операција. Трибините беа исполнети со навивачи и публика, а присутните ја покажаа хуманоста на дело, претворајќи го овој натпревар во вистински пример како спортот може да обединува и да помага.
Младост со оваа победа не само што ги освои бодовите, туку испрати и силна порака – и на теренот и надвор од него.
