Македонското судење повторно доби големо признание на европска сцена, откако интернационалката Ивана Пројковска е дел од судискиот тим за реванш полуфиналниот дуел од Лигата на шампионите во женска конкуренција меѓу Барселона и Баерн Минхен.
Натпреварот ќе се одигра утре на стадионот „Камп Ноу“, а влогот е пласман во големото финале. Првиот меч одигран во Минхен заврши без победник (1:1), што најавува неизвесна и возбудлива пресметка.
Главен судија на натпреварот ќе биде Французинката Стефани Фрапар. Нејзини асистентки ќе бидат Камиј Соријано и Сихам Будина. Улогата на ВАР судија ќе ја има Вили Делаџод, додека асистент ВАР ќе биде Елиза Допо. Македонската интернационалка Ивана Пројковска е одредена за четврти судија.
Ова назначување претставува уште една потврда за квалитетот на македонските судии на меѓународната сцена, како и за довербата која УЕФА ја има во Пројковска за натпревари од највисок ранг.
