Македонскиот шампион Вардар 1961 вечерва го отвора четвртфиналниот двомеч во Европската лига со гостување кај францускиот гигант Монпелје – дуел што носи тежина на вистински европски класик.
Станува збор за пресметка меѓу два поранешни шампиони на Европа. „Црвено-црните“ се искачија на европскиот трон во 2017 и 2019 година, додека Монпелје славеше во 2003 и 2018, што само ја засилува тежината на овој четвртфинален судир.
Францускиот тим на хартија ја има фаворитската улога, особено поради искуството и ростерот со кој располага, но и поради фактот што Вардар ќе настапи со скратена ротација. Сепак, избраниците на Иван Чупиќ имаат што да понудат. Вардарци одиграа одлична главна фаза, ја освоија групата и обезбедија директен пласман во четвртфиналето, со само два порази на десет натпревари.
Дополнителен мотив за македонскиот состав е и формата – без пораз во домашниот плеј-оф и со изразена самодоверба, што може да биде клучен фактор пред ова тешко гостување.
Од другата страна, Монпелје до четвртфиналето стигна преку убедлив настап во плеј-офот против Елверум, а и покрај силната конкуренција во групната фаза, покажа дека знае да се носи со најдобрите, со значајна победа над Фленсбург.
Натпреварот во Франција ќе биде вистински тест за карактерот на Вардар. Дисциплинирана одбрана, трпелив напад и максимална концентрација ќе бидат неопходни ако „црвено-црните“ сакаат активен резултат пред реваншот.
Историјата покажала – кога е најтешко, Вардар знае да изненади. Сега е моментот повторно да го потврди тоа на европската сцена.
