Денеска во рамките од 28. коло од домашното првенство на стадионот Петар Милошевски во Битола од 15:00 часот ќе се сретнат екипите на Пелистер и Македонија ЃП.
Уште еден од серијата дуели кои што периодов ќе ги гледаме, а се однесуваат на битката за опстанок, односно кои екипи ќе ги гледаме во ПМФЛ, а кои во второлигашката конкуренција следната сезона.
Македонија ЃП како тим има доста квалитет во себе, пред се во младите и надежи македонски младински репрезентативци.
Еден од нив секако е Мартин Џангаровски, кој што во континуитет е споменуван како еден од нашите најдобри млади фудбалери. Има сериозна прволигашка минутажа, иако е генерација, 2008, и веќе е стандарден репрезентативец.
„Очекуваме многу тежок и борбен натпревар против ФК Пелистер. Станува збор за директен конкурент и знаеме колку значат бодовите. Ние сме максимално фокусирани, подготвени и веруваме во нашите квалитети дека можеме да дојдеме до позитивен резултат. Нема место за такви мисли. Додека постојат и теоретски шанси, ние ќе се бориме до крај. Тимот има карактер и верба и ќе дадеме максимум на секој натпревар. Во вакви натпревари најважно е да се биде дисциплиниран, фокусиран и да се игра како тим. Деталите одлучуваат, затоа треба ја искористиме секоја шанса што ќе ни се укаже“ – вели Мартин Џангаровски за денешниот натпревар во Битола.
