Осогово извлече бод во дуелот со Шкендија Арачиново и тоа во судиското надополнување, благодарение на голот на Филип Јованов, кој беше прецизен за конечни 1:1.
Овој гол донесе бод за „жетварите“, но и голема радост кај домашната публика, верните „сејмени“ и за самиот град. Осогово продолжува да го напаѓа петтото место што е главна цел до крајот од сезоната.
Јованов по мечот истакна дека во фудбалот треба борба до последната секунда, дополнува дека голот во самиот финиш за него значи многу, но и за целиот тим, притоа се заблагодари за поддршката од навивачите.
„Ова а фудбал, борба до последната секунда. Против ФК Шкендија не беше лесно, но срцето и вербата не не напуштија, а поддршката од навивачите како наш 12-ти играч и дома и на гости ни дава дополнителна сила. Голот во самиот финиш значи многу за мене, но уште повеќе за тимот. Овој бод ни дава сила за понатаму“, рече фудбалерот на „жетварите“, Филип Јованов.
Осогово сега го дели шестото место со Детонит Плачковица со по 44 бодови и има четири помалку од петтопласираната Беласица. Во следното коло Осогово на домашен терен ќе игра против Тетекс.
