Вардар и Пелистер одиграа без голови на вечерното дерби во Битола. Со тоа Пелистер после триумфот над Шкендија, сега останува непоразен и со вториот претендент за титулата, и ја прави битката за титулата во ПМФЛ уште поинтересна во финишот од сезоната.
Како и против Шкендија минатото коло, така и сега апсолутен херој на Пелистер е голманот Андреј Јовчевски кој успеа да одбрани неколку добри обиди на Вардар, а ја скроти и најдобрата шанса на скопските „црвено-црни“ во судиското надополнување.
Првата закана на Вардар дојде од Николов, кој шутираше од 20 метри, но топката мина само крај голот. Следната шанса ја имаше Кастањеда, кој во 30. минута се обиде, но неговиот удар беше одбранет од Јовчевски.
Во 50. минута Данев од левата страна остро ја упати топката кон петте метри, Јовчевски интервенираше. Во следната минута голманот на Пелистер ја расчистува и мешаницата во неговиот петерец и брани уште една шанса за Вардар. Јовчевски го одбрани и обидот на Кастањеда во 78. минута.
Петата минута од судиското надополнување ја донесе и најдобрата шанса во вториот дел. Матиќ одлично зафати една одбиена топка и шутираше од 17 метри, меѓутоа Јовчевски со парада спаси.
Потоа изведен корнер, и Јовчевски интервенираше. Последниот обид го имаше Омерагиќ длабоко во судиското надополнување, но неговиот обид со глава заврши над голот.
