Кеги Моби се пласираше во финалето од Купот на Македонија, откако по вистинска драма и пенал-рулет ја елиминираше екипата на Јувентус Серава.
Полуфиналето донесе возбудлив и ефикасен натпревар, кој во регуларниот дел заврши без победник, со дури осум постигнати голови (4:4).
Велешани одлично го отворија мечот и уште во 4. минута поведоа преку Петар Левков. Само осум минути подоцна, Трајче Трајков зголеми на 2:0. Сепак, Јувентус Серава брзо се врати во игра – Омер Османи намали на 2:1 во 17. минута, но веднаш потоа Стефан Димовски повторно донесе предност од два гола (3:1), резултат со кој се замина на пауза.
Во второто полувреме следуваше вистинска голеада. Кирил Ивановски погоди за Кеги Моби, додека за противникот возврати Ќендрим Абази. Токму Абази подоцна уште еднаш се запиша во листата на стрелци за 4:3, а Фуркан Шабани донесе ново израмнување за конечни 4:4 во регуларниот дел.
Победникот се решаваше преку пенали, каде што двете екипи беа сигурни во првите четири серии. За Кеги Моби погодуваа Кирил Ивановски, Трајче Трајков, Иван Стојановски и Александар Михајлов, додека кај Јувентус Серава прецизни беа Фуркан Шабани, Ќендрим Абази, Армандо Алијевиќ и Шефки Бериша.
Одлучувачки беше петтиот круг – Стефан Димовски реализираше за Кеги Моби, додека Исмаил Абдуловски не успеа да погоди за Јувентус Серава, со што велешани обезбедија место во финалето.
Во големото финале, Кеги Моби ќе се соочи со екипата на Проект, тим кој сезонава е перфектен и без пораз. Клубот од Јосифово веќе ја освои шампионската титула, а сега ќе атакува и на Куп-трофејот, додека Кеги Моби ќе се обиде да го сопре нивниот победнички налет и да стигне до трофејот.
