Дербито во ракометната Прва лига донесе убедлива победа на Мулти Есенс, кој во Автокоманда го совлада Младост Богданци со 39:27 и со тоа му го нанесе првиот пораз на ривалот оваа сезона.
Во првото полувреме се водеше рамноправна борба, со чести промени на резултатот и минимални разлики. Сепак, домаќините во финишот успеаја да направат мала предност и на пауза заминаа со водство од 19:17.
Клучниот период дојде на стартот на второто полувреме, кога Мулти Есенс ја искористи кризата во играта на Младост и со серија голови се одлепи на 27:20.
Од тој момент натаму, контролата беше целосно на страната на домашниот тим, кој без поголеми проблеми ја задржа високата разлика до самиот крај.
Најефикасен во победничкиот состав беше Немања Џигероски со девет погодоци, додека значаен придонес дадоа и Јулијан Матески и Дарјан Ѓоќески со по шест гола. Сигурен на голот беше и Стефан Јорданов со двоцифрен број на одбрани. Кај Младост, Лазар Адамовиќ се истакна со 11 реализации.
Со оваа победа, Мулти Есенс го презеде лидерското место на табелата и направи голем чекор кон директен пласман во Суперлигата, додека Младост ќе мора да бара шанса преку преостанатите натпревари да се врати во трката за првата позиција.
