Големото дерби од 22. коло во Втората лига донесе ново разочарување за Охрид, кој не успеа да ја прекине негативната традиција против Брегалница и по цели 17 години.
„Рибарите“ загубија во Штип со 1:0, а мечот беше решен со вистински еврогол на Лука Ѓеоргиев.
Иако најавите беа дека ова може да биде натпреварот во кој Охрид конечно ќе го скрши малерот против „сините“, тоа не се случи ниту овојпат.
Брегалница повторно покажа дека знае како да игра против овој ривал, особено на домашен терен, и со минимална, но значајна победа ги задржа шансите за врвот, бидејќи само првата позиција директно води кон Прва лига, а второто и третото место кон баражот за можен пласман.
Овој пораз има сериозни последици за охриѓани, кои го загубија и првото место на табелата. Нов лидер сега е Скопје со 50 бодови, додека веднаш зад него, на делба на втората позиција, се Охрид, Брегалница и Шкендија Арачиново – сите со по 49 бодови.
Сепак сите четири екипи имаат еднакви шанси за влез во Прва лига и ништо не е загубено за било која на осум кола до крај.
Битката за Првата лига дополнително се комплицира, а дербито во Штип покажа дека секој бод ќе биде пресуден во неизвесната трка до самиот крај на сезоната.
