Екипата на Гевгелија израмни на (1-1) во финалната серија од плеј-офот за пополнување место во Првата женска лига, откако на домашен терен убедливо славеше против Струга 2009 со 75:60.
По изедначеното прво полувреме, во кое гостинките од Струга имаа минимална предност од 36:35, натпреварот целосно се сврте во корист на домаќинките во третата четвртина. Токму тој период се покажа како пресуден, бидејќи Гевгелија направи серија од 26:7 и го скрши отпорот на противникот.
До победата, тимот на Гевгелија го предводеа Стојковска и Димковска со по 16 поени, додека искусната Деловска додаде 14. На спротивната страна, Зиба одигра извонреден меч со 30 поени, но немаше доволна поддршка, иако Даути постигна 12, а Хиса осум поени.
Со оваа победа, серијата е израмнета и одлуката за новиот член на Првата лига за сезоната 2026/2027 ќе падне на третата, решавачка средба.
„Мајсторката“ е закажана за 29 март (недела) од 17:00 часот, повторно во спортската сала „26. април“ во Гевгелија, каде ќе се решава кој ќе се приклучи на друштвото на најдобрите женски екипи во Македонија.
