Ко-лидерите на табелата, екипите на Соколи 1933 и Струмица 2001 во 7.коло имаат „домашни задачи“
Уште две кола до крајот на ТОП 8 фазата во Првата македонска лига, по кои ќе се дефинира конечниот изглед на табелата во оваа конкуренција.
А две екипи, Соколи 1933 и Струмица 2001, во овој момент, пред одигрувањето на 7.коло, се во минимална предност во однос на други две (Борец баскет и Бутел), кои се дел од првата „четворка“, и кои извесно, ќе играат за тоа едно место кое води во Суперлигашката конкуренција.
Седмиот круг ќе биде отворен во петок попладне, од 17.часот, кога во салата „Јордан Мијалков“ во Штип ќе играат екипите на Соколи 1933 и Водно санс.
Штипјани, кои се ко-лидери на табелата (скор 9-3), се во улога на фаворити, но ќе треба да ја оправдаат во текот на овие 40.минути против младиот скопски тим (учинок 2-10).
Останатите три натпревари од ова коло, се во саботните термини.
Од 17.часот ќе се одиграат два натпревари.
Првиот е во Струмица, каде во салата „Никола Карев“, Струмица 2001 (ефект 9-3) го дочекува прилепски Мега баскет (4-8), а во исто време, во Бутел гостува екипата на Охрид (3-9).
Еден час подоцна, во Велес, екипата на Борец баскет (скор 8-4) ќе бара враќање на победничките патеки во дуелот со екипата на Вардар (5-7).
