Ракометна Автокоманда во сабота ќе „гори“ – дербито на сезоната меѓу Мулти Есенс и непоразениот лидер Младост од Богданци ќе реши многу работи, а едно е сигурно – ќе го добиеме одговорот и кој ќе патува директно во Супер лигата.
Тренерот на непоразениот лидер, искусниот охридски стратег, Горан Андоновски за Спортска Мрежа отворено зборуваше за овој клучен меч на сезоната.
Андоновски вели дека Младост заслужува да биде дел од Супер лигата, дополнува дека во Автокоманда ги очекува меч со беспоштедна борба 60 минути и многу трчање и дуели…
„Младост со своите резултати, концепт, модерен пристап на теренот е вистинско освежување на ракометната мапа на Македонија. Заслужуваме Супер лига, но и покрај тоа што сме непоразени се’ уште не сме ја постигнале целта. Се подготвуваме за натпреварот со Мулти Есенс, тим составено од речиси најдоброто од младинската и кадетската категорија засилени со неколку поискусни ракометари како Костадин Петров и Џигероски, знаеме дека нè очекува беспоштедна борба 60 минути и многу трчање, дуели…“, рече Горан Андоновски за Спортска Мрежа.
Искусниот ракометен стратег дополнува дека во Автокоманда одат по победа, а местото на Младост му е во Супер лигата.
„Одиме на победа како на секој натпревар, нашиот прв меч беше вистински суперлигаш и покажа дека и двете екипи заслужуваат Супер лига. Богданци и околината го препознаваа нашиот мотив, залагање, работа, ангажираност, да го вратиме Младост во Супер лига каде припаѓа и се надевам дека сите заедно ќе ја потврдиме посакуваната цел“, заклучи Андоновски во разговор за Спортска Мрежа.
Дербито во сабота меѓу Мулти Есенс и Младост се игра со почеток од 15 часот.
