Ракометарите на ГРК Охрид в недела ги очекува првиот четвртфинален предизвик од ЕХФ Европскиот Куп против Олимпијакос во Атина. Охриѓани влегуваат подготвени во дуелот, свесни за квалитетот на противникот, но и за значењето на првиот натпревар пред реваншот на домашен терен.
Еден од клучните играчи од редовите на охриѓани, Анте Иванковиќ, потенцира дека тимот имал доволно време за подготовка и детална анализа на противникот, кој располага со искусен и квалитетен состав.
„Нè очекува тежок натпревар во Атина против Олимпијакос. Олимпијакос има многу добар тим, со големи имиња во својот состав. Имавме десетина дена да се подготвиме за овој натпревар, направивме многу добра анализа и тактика и сум сигурен дека секој од нас ќе биде мотивиран и подготвен за дуелот кој ќе ни открие многу за реваншот во ‘Билјанини извори’.“- изјави Иванковиќ.
Натпреварот во Атина ќе биде прв тест во овој двомеч, но и важен показател за тоа како Охрид ќе влезе во реваншот, каде што ќе се решава патникот во полуфиналето.
Охриѓани ќе се обидат да извлечат активен резултат на гости, а конечната разврска се очекува пред домашната публика, каде што тимот ќе ја бара својата европска шанса.
