Вечерва со два меча се затвори 15. коло во Втората футсал лига на Македонија. Убедлива победа однесе СЕЕ Университи откако тетовскиот тим со 11:3 го декласираше во целост составот на ССК.
Едис Муртезани постигна четири погодоци за домаќинот во убедливата победа, по двапати стрелаа Гезим Азизи и Исмет Цека, а пак по еден гол постигнаа Самир Рамадани, Амин Шаќири и Хисен Мемеди.
За гостинот стрелци ба Илија Алексовски, Даниел Јанков и Дамјан Ѓуровски, а сите погодоци беа постигнати во вториот дел.
Ланскиот прволигаш Црна Река со 5:1 го „прегази“ Овче Поле и ја израдува домашната публика. Во првиот дел беше неизвесно гостинот од Свети Николе преку Давид Бојковски го отвори резултатот во 6. минута, а две минути подоцна Никола Димов погоди за 1:1 на полувреме.
Во вториот дел кавадарчани „експлодираа“ откако Стојан Петковски постигна два гола, а по еден Димитар Чоков и Ѓорѓи Стрезовски и го решија мечот со 5:1.
На првото место на табелата е Железарец со 34 бодови, втор е СЕЕ Университи со 33 бодови, трет е составот на Црна Река со 30 бодови, а пак Каршиака е четврта со 28 бодови.
Првите две позиции директно водат кон пласман во Првата футсал лига.
