Охрид вечерва славеше сигурна победа во македонското дерби против Тиквеш во рамки на 2. коло од ЕРС (eFootball Pro Champions), откако „рибарите“ со 2:0 го добија тимот од Кавадарци.
Натпревар со многу шанси и чисти мрежи во првите 45 минути (0:0), па неизвесноста продолжи во вториот дел. Во 58. минута од мечот по една одлична нафрлена топка во шеснаесетникот со одличен удар со глава тимот на Охрид го отвори резултатот за водство од 1:0.
Не требаше многу за „рибарите“ да дојдат до двојна предност од 2:0, откако Охрид организираше една одлична акција, а еден „рибар“ испрати силен проектил од околу 20-тина метри, за што голманот на Тиквеш беше немоќен да интервенира.
До крајот Охрид имаше уште шанси и за поубедлива победа, но резултатот од 64. минута (2:0) стана конечен.
Во првото коло Охрид одигра 0:0 против црногорскиот тим Будуќност, а за Тиквеш ова е втор пораз во низа и со тоа е на дното од табелата без бодови. Во следното коло Охрид ќе ги одмери силите со екипата на Локомотива Загреб.
Како што претходно објавивме, ќе ги следиме сите натпревари на „рибарите“. Лигата се игра во популарниот 3 на 3 мод, а боите на ГФК Охрид Лихнидос ги бранат Иван Иванов – државен шампион во eFootball во Македонија, играч кој потекнува од Радовиш, како и Марко Дринаковиќ, Вук Алексиќ и Милорад Зовичевиќ.
Натпреварите може да се следат во живот на Arena eSport ТВ каналот, како и на нивниот официјален YouTube канал.
