Ракометната репрезентација на Македонија ќе се соочи со селекцијата на Словачка во баражот за пласман на Светското првенство во Германија наредната година.
Словаците до третата бараж-фаза стигнаа по драматичен двомеч против Украина. Иако во реваншот на домашен терен беа поразени со 32-31, победата од првиот натпревар (27-24) им беше доволна за пласман понатаму.
Украина имаше одлична можност да направи пресврт, откако во текот на мечот неколкупати водеше со шест голови разлика, а на полувремето замина со убедлива предност од 20-15.
Сепак, пресуден беше падот во играта на почетокот од вториот дел. Словачка брзо се врати во игра и израмни на 23-23, по што натпреварот влезе во неизвесна завршница „гол за гол“, сценарио кое им одговараше на домаќините и им овозможи да го задржат вкупното водство.
Во редовите на Словачка, Бријатка беше најефикасен со осум погодоци, Прокоп додаде пет, а Сметанка четири. Капитенот Љубомир Дуриш го одигра својот последен натпревар во националниот дрес и постигна три гола.
Голманите Зернович и Конечни имаа значаен придонес со вкупно 13 одбрани, додека кај Украина најрасположен беше Турченко со осум голови.
Првиот натпревар од битката за мундијалскиот пласман ќе се игра на 13 или 14 мај во Словачка (Братислава, Кошице или Бистрица), додека реваншот е закажан за 17 мај во Скопје, каде ќе падне конечната одлука за патникот на Светското првенство.
