ЖРК Атлетик продолжува со создавање стабилен и конкурентен тим за иднината, откако пивотот Дафина Соколовска го продолжи договорот со клубот до 2029 година.
Станува збор за ракометарка која има богато искуство и развоен пат низ најпознатите македонски школи. Соколовска своите први чекори ги прави во ЖРК Вардар во 2015 година, по што кариерата ја продолжува во академијата на Металург, каде се развива и станува дел од младинските категории. Во 2022 година повторно се враќа во Вардар, каде настапува до 2025 година и освојува титули во кадетска и младинска конкуренција.
Од оваа сезона таа е дел од Атлетик, а со новиот договор клубот јасно покажува дека сериозно смета на неа како важен дел од проектот. Од двете страни постои задоволство од соработката, што резултираше со долгорочно продолжување.
Во меѓувреме, Атлетик има фантастична сезона зад себе – тимот бележи максимален ефект во Првата женска ракометна лига и веќе обезбеди пласман во Супер лигата од следната сезона.
Со вакви потези и задржување на клучните играчи, Атлетик испраќа јасна порака дека гради амбициозен состав подготвен за нови предизвици на највисоко ниво.
