Идејата за формирање на нова Регионална ракометна лига со клубови од Србија, Македонија и Црна Гора е многу блиску до реализација. Како што објавува српскиот медиум Mozzart Sport, конечниот договор би требало да биде постигнат на состанок кој е закажан следниот понеделник во Белград.
Според планот, во натпреварувањето би учествувале десет екипи по систем 4-4-2, односно четири клуба од Србија, четири од Македонија и два од Црна Гора. Србија би ја претставувале Партизан, Војводина, Динамо Панчево и Дубочица, додека од Црна Гора се очекува настап на Ловќен и Будванска Ривиера.
Од македонска страна најверојатни учесници се Вардар 1961, Еурофарм Пелистер, Алкалоид и ГРК Охрид, но според информациите на „Mozzart Sport“ се уште се чека конечниот одговор дали овие клубови ќе се приклучат на новото регионално натпреварување.
Планирано е лигата да се игра по двокружен систем, со вкупно 18 кола во кои секој тим ќе се соочи со сите ривали, а сезоната би завршила со финален турнир на крајот на март. Поради обврските на дел од клубовите во европските купови, натпреварите во ова натпреварување најверојатно би се играле за време на викендите.
Дополнително, се разгледува и можноста во иднина оваа лига да носи одредени бенефити или пласман во европските натпреварувања, но таква опција не се очекува уште во првата сезона, туку евентуално од натпреварувачката 2027/2028.
Регионалната лига би била нов обид за враќање на силните меѓународни дуели во регионот, по згаснувањето на СЕХА лигата во последните години.
ФОТО: РК Вардар 1961, ГРК Охрид, РК Алкалоид, РК Еурофарм Пелистер
