В недела се игра мега дербито на Југот меѓу Ударник и Победа Валандово во Пирава, дерби кое повеќе од јасно е дека ќе ја исполни трибината на фудбалскиот терен и се очекува голем број на публика.
Ударник кој е домаќин на мега дербито излезе со официјално соопштение пред самото дерби кое се игра в недела со почеток од 14 часот на фудбалскиот терен „Ѓоге Џонов“.
Поради најавената голема посетеност, на влезовите на стадионот ќе се врши задолжителен претрес за пиротехнички средства, алкохол и други недозволени предмети, од таа причина ФК Ударник ги замолува навивачите и љубителите на фудбалот да пристигнат еден час пред натпреварот, со цел да се избегнат гужвите, а по почетокот на натпреварот вратите на стадионот ќе бидат затворени и нема да биде дозволен влез, се потенцира во соопштението на клубот од Пирава.
„Почитувани навивачи и љубители на фудбалот, Ве покануваме да присуствувате на претстојниот дерби натпревар, каде очекуваме голема поддршка од трибините и вистинска фудбалска атмосфера.
Поради најавената голема посетеност, ве информираме дека на влезовите на стадионот ќе се врши задолжителен претрес за пиротехнички средства, алкохол и други недозволени предмети.Поради тоа, ве замолуваме да пристигнете најмалку 1 час пред почетокот на натпреварот, за да се избегнат гужви и да може сите навремено да влезат на стадионот. По почетокот на натпреварот, вратите на стадионот ќе бидат затворени и нема да биде дозволен влез.
Исто така апелираме до сите навивачи:
Да навиваме спортски, фер и без инциденти.
Да покажеме дека сме вистински љубители на фудбалот и дека знаеме да направиме одлична атмосфера.Секој најмал инцидент може да предизвика сериозни последици и казни за клубот, за одговорното лице, како и за лицата кои ќе го предизвикаат инцидентот. Казните се многу високи, затоа ве замолуваме сите заедно да придонесеме натпреварот да помине во пријатна, спортска и фер атмосфера“, се вели во соопштението на ФК Ударник.
Во првото пролетно коло екипата на Ударник загуби со минимални 1:0 во Делчево од Брегалница, додека пак Победа Валандово беше слободна.
Инаку, тимот од Валандово е непоразен лидер со 28 бодови, а пак тимот од Пирава сега е трет со 25 бодови, колку што има и екипата на Овче Поле од Свети Николе која е втора, со тоа што Победа има меч помалку.
Трите екипи имаат отворени амбиции да го напаѓаат првото место кое води кон баражот за можен влез во Втора лига.
