Спортската инфраструктура во Крива Паланка доби значајно унапредување, откако денес официјално беа пуштени во употреба новите трибини на Градскиот стадион со вкупен капацитет од 1050 седишта.
Со оваа инвестиција, спортскиот комплекс во Крива Паланка дополнително се профилира како модерен простор за спорт, рекреација и здрав начин на живот, наменет за сите генерации и за организирање на бројни спортски настани.
Нарачувач на проектот е Општина Крива Паланка, додека изведувач на работите е компанијата ДГПТУ Дине Трејд ДОО. Надзорот и техничкиот преглед на изградбата ги изврши МГ Проект ДООЕЛ Скопје.
Вкупната вредност на инвестицијата изнесува 3.402.810 денари со вклучен ДДВ, а средствата се обезбедени од Министерството за спорт.
Од Општина Крива Паланка истакнуваат дека со вакви проекти продолжуваат да инвестираат во развојот на спортската инфраструктура, со цел подобри услови за спортистите и поголемо уживање за љубителите на спортот.
„Во секој град постојат места каде што се раѓаат соништата. Во Крива Паланка отсекогаш тоа бил фудбалскиот терен. Денес, спортскиот комплекс во Крива Паланка добива нова енергија со новоизградени трибини. Трибини создадени за нови аплаузи, за навивање и за нови спортски успеси и јасна намера – да го вратиме големиот фудбал во Крива Паланка, која повторно ќе живее за големиот фудбал“, рече градоначалникот на општина Крива Паланка, Сашко Митовски.
Со новите трибини, Градскиот стадион е подготвен да ги пречека навивачите и да биде место за нови спортски возбудувања и незаборавни натпревари.
