Струга Трим Лум нема победа од стартот на пролетта, но се чини дека денеска ќе ја има идеалната шанса за тоа. На крајбрежјето гостува Шкупи, последнопласираниот тим на табелата кој бележи само порази и во вториот дел од првенството и има само еден освоен бод во шампионатот.
„Секако дека сме подготвени за првата победа во пролетниот дел од сезоната“, порачува Бојан Илиевски во пресрет на првенствениот дуел против Шкупи.
„Се наоѓаме во мала криза и мислам дека натпреварот против Шкупи доаѓа во вистински момент за да излеземе од неа, да се вратиме на победите и да покажеме дека резултатите што ги постигнавме есеноска не беа случајни“, изјави Илиевски.
Без разлика на сѐ, стружани нема да го потценат Шкупи.
„Ние не потценуваме ниту еден тим, па така и денешниот противник. Можам да кажам дека против секоја екипа се подготвуваме на ист начин, без разлика дали играме против првопласираната или последнопласираната екипа“, заврши Бојан Илиевски.
Натпреварот меѓу Струга Трим Лум и Шкупи е закажан за 13 часот на Градскиот стадион во Струга и го отвора 22.коло од Првата фудбалска лига.
