Македонскиот шампион Шкендија го загуби првиот натпревар од плејофот во УЕФА Конференциска лига против Самсунспор со 0-1 и со гол заостанување ќе патува на реваншот во Турција.
Тетовци на арената „Тодор Проески“ во Скопје се соочија со мотивиран противник кој од стартот ја презеде иницијативата. Турскиот состав имаше повеќе од играта и уште во раната фаза доби можност да поведе од пенал, но ударот од белата точка заврши над голот.
Шкендија претежно се бранеше и се обидуваше преку контри да создаде опасност, но не успеа посериозно да го загрози противничкиот гол. Одлуката падна во 77. минута, кога по акција по левата страна Мариус ја испрати топката во мрежата за конечни 0-1.
До крајот гостите рутински ја сочуваа предноста, па сега избраниците на Беќири ги очекува тешка задача на реваншот во Самсун, каде ќе се обидат да ја надоместат минималната негатива и да останат во европската трка.
