Европската ракометна федерација реагираше на критиките за сегашните распореди на натпреварите на Европското првенство 2026 и најави конкретни промени за идните континентални шампионати. Целта е да се намали оптоварувањето на играчите и да се обезбеди подобар баланс меѓу деновите за одмор и патување.
Во соопштението, ЕХФ истакнува дека сегашните распореди се подготвуваат многу однапред, во соработка со организаторите, и дека двојни натпреварувачки денови постоеле и на претходни шампионати. Исто така, федерацијата напоменува дека прилагодувањата за идните ЕП зависат од фазата на организациските процедури.
„Важно е да се напомене дека ваквите распореди секогаш се подготвуваат многу однапред, во соработка меѓу организаторите и ЕХФ. Распореди со двојни натпреварувачки денови постоеја и на претходни првенства. Исто така, можностите за прилагодување на идните ЕП зависат од фазата на организациските процедури“, стои во соопштението од ЕХФ.
За идните турнири веќе се најавени конкретни промени:
- Женско Европско првенство 2026 (Полска, Романија, Чешка, Словачка, Турција, 3–20 декември 2026) – распоредот ќе гарантира јасна поделба меѓу деновите за патување и деновите за одмор.
- Машко Европско првенство 2028 (Шпанија, Португалија, Швајцарија, 13–30 јануари 2028) – нема да има последователни натпреварувачки денови; деновите за патување и одмор ќе бидат одвоени, а два натпревари во два дена ќе се избегнуваат.
- Женско Европско првенство 2028 (Норвешка, Данска, Шведска) и сите ЕП од 2030 па натаму – ЕХФ разговара со организаторите за воведување четвртфинална фаза. Ако се воведе, максималниот број натпревари ќе остане девет, но ќе се обезбеди барем еден ден одмор меѓу секој дуел и одвоени денови за патување.
Со оваа промена, ЕХФ индиректно признава дека сегашниот систем создава проблеми, но најавува похуман и поправеден натпреварувачки распоред во иднина.
За македонската машка репрезентација, воведувањето на четвртфинална фаза значи дополнителна шанса за напредок. Според новиот систем, ако се применуваше сега, Македонија ќе беше дел од главната рунда и ќе се натпреваруваше во Хернинг, со можност за повисок пласман.
