На 24 и 25 јануари започнува најстариот нордиски куп на Балканот, кој и оваа година повторно ќе ги собере најдобрите скијачи на едно место. Натпреварот ќе се одржи во Маврово, во рамки на традиционалниот „Мавровски меморијал“, кој има големо значење за македонскиот зимски спорт.
Овој меморијален настан се организира во чест и сеќавање на загинатите градители на хидросистемот „Маврово“, а низ годините прерасна во симбол на традицијата и спортскиот дух во Македонија.
„Мавровскиот меморијал не е само традиционален натпревар – тој е гордост за македонското скијање и е дел од нашата спортска историја. Со секое ново издание ние ја чуваме оваа традиција, ги поддржуваме и мотивираме младите спортисти да се развиваат и да го даваат најдоброто од себе, а истовремено ја промовираме Македонија како привлечна дестинација за зимски спортови“, изјави Дејан Пановски, претседател на Скијачката федерација на Македонија.
Овој настан е во организација на Скијачката федерација на Македонија во соработка со Меѓународната скијачка федерација (FIS), и ски клубот Мирна Долина, и е со поддршка на Министерстово за спорт, ЕЛЕМ и УНИ Банка.
