Прволигашот Брера Струмица официјално го претстави своето ново засилување пред почетокот на пролетниот дел од сезоната. Нов член на струмичани е 22-годишниот Леонардо Петровиќ, офанзивец кој настапува на крилната позиција и во тимот пристигнува како слободен играч.
Петровиќ доаѓа од Хрватска, каде што во есенскиот дел од сезоната настапуваше за екипата на Кроациа Змијавци во Втората лига. Во тој период запиша 12 настапи, постигна еден погодок и додаде две асистенции, со што го привлече вниманието на раководството на Брера.
Станува збор за фудбалер кој ја поминал целата младинска школа на Хајдук Сплит, а има и статус на поранешен младински репрезентативец на Хрватска до 17 години. Иако не дебитираше за првиот тим на Хајдук, Петровиќ стекнуваше искуство преку настапи во неколку клубови од регионот. Покрај Змијавци, во својата кариера играше и за Јадран во Хрватска, како и за Радник Бијељина и Посушје во Босна и Херцеговина, каде што мина две сезони.
Од таборот на Брера Струмица изразија задоволство од ангажманот на младото крило, кое треба да донесе дополнителна енергија и ширина во офанзивата во продолжението од првенството. Струмичкиот клуб му посака добредојде на Петровиќ и многу успех во дресот на Брера.
