ГКК Охрид официјално го претстави Стефан Донаковски како ново засилување во вториот дел од сезоната, со јасна цел – атак на врвот и пласман во Суперлигата на македонската кошарка.
Искусниот кошаркар, висок 200 сантиметри, повторно ќе го носи дресот на охридскиот клуб, откако во минатото беше дел од поранешниот АВ Охрид. Со неговото доаѓање, „сино-белите“ добиваат цврстина, енергија и сигурност под обрачите, каде што Донаковски се очекува да биде важен фактор и во одбраната и во нападот.
Донаковски добро ја познава кошаркарската средина во Охрид и поддршката од домашната публика, а до крајот на сезоната ќе ги брани боите на клубот и ќе даде максимум во исполнувањето на зацртаните амбиции.
По есенскиот дел од сезоната во групата Б од Првата кошаркарска лига, ГКК Охрид се наоѓа на третата позиција со 16 бодови, со учинок од шест победи и четири порази. Охриѓани заостануваат само два бода зад лидерите Вардар и Мега Баскет, кои имаат по 18 бодови, што најавува возбудлива борба за самиот врв во продолжението од сезоната.
