Ракометарите на Аеродром веќе една седмица активно се подготвуваат за пролетниот дел од сезоната во Првата лига. Под водство на тренерот Митко Стоилов, екипата ги одработува тренинзите во СЦ „Јане Сандански“, каде се кова формата за предизвиците што следуваат во продолжението од шампионатот.
Аеродром есенскиот дел од сезоната го заврши на одличното петто место со освоени 14 бодови, со биланс од седум победи и шест порази, со што се пласираше меѓу ТОП 5 екипите на табелата.
Во зимскиот преоден рок, клубот го напушти само пикерот Матеј Марковски, кој ја продолжи кариерата во редовите на суперлигашот Бутел Скопје. Од друга страна, стручниот штаб ќе има на располагање дури шест нови ракометари за пролетниот дел од сезоната.
Новите имиња во ростерот на Аеродром се пикерот Ангел Мирчески, десното крило Петар Тодоровски, голманот Филип Митев, средниот бек Стефан Стефаноски и левото крило Аган Бериша, кои треба да донесат свежина, конкуренција и поголема ширина во составот.
Пролетниот дел од првенството Аеродром ќе го отвори со гостување кај Драчево Јуниор, натпревар кој ќе биде прв тест за формата на екипата по подготвителниот период.
