Ракометарите на ГРК Охрид продолжуваат со одличните настапи во подготвителниот период, откако триумфираа на меѓународниот турнир „Вук Рогановиќ“ што се одржа во Белград. Македонскиот суперлигаш во финалето беше подобар од словенечкиот Тримо Требње и заслужено се закити со нов трофеј.
Избраниците на Борис Ројевиќ одиграа контролирано и зрело финале, наметнувајќи свое темпо уште од самиот почеток. Охрид имаше резултатска предност во поголемиот дел од натпреварот и на крајот славеше со 23:28, потврдувајќи ја добрата форма и јасните амбиции пред стартот на сезоната.
Индивидуалните признанија исто така завршија во рацете на охриѓани. Стефан Петриќ беше прогласен за МВП на финалниот натпревар, додека Тилен Стрмљан ја доби наградата за најкорисен играч на целиот турнир. Дополнително признание доби и стратегот на Охрид, Борис Ројевиќ, кој беше избран за најдобар тренер на турнирот.
Со овој успех, Охрид уште еднаш покажа дека чекори во вистинска насока, а добрите резултати на меѓународна сцена се дополнителен сигнал дека „гладијаторите“ со голема самодоверба го очекуваат продолжението од сезоната.
