Општина Охрид по петти пат по ред го распиша конкурсот за избор на „Најдобрите од спортот во општина Охрид“, со што продолжува традицијата на вреднување и наградување на најуспешните спортистки, спортисти, тренери и спортски колективи за резултатите остварени во текот на 2025 година.
Јавниот повик е објавен од страна на градоначалникот на Општина Охрид, а пријавувањето трае до 30 јануари 2026 година до 14:00 часот. Право на учество имаат спортските клубови со седиште во Охрид, националните спортски федерации, како и физички лица – жители на општината, со уредно доставена документација.
- Богат избор на категории и парични награди
Наградите ќе бидат доделени во повеќе категории, со цел да се опфатат сите сегменти од спортскиот живот во градот:
-
Спортист/ка на годината – плакета и 45.000 денари
-
Охридска спортска надеж (индивидуален и колективен спорт, мажи и жени) – плакета и по 15.000 денари
-
Тренер на годината – плакета и 20.000 денари
-
Спортска екипа на годината – плакета и 15.000 денари
-
Спортист/ка кој/а не е од Охрид, а настапува за екипа од Охрид – плакета и 15.000 денари
-
Спортист/ка од Охрид кој/а настапува надвор од градот – плакета и 15.000 денари
-
Спортист/ка во категоријата на лица со посебни потреби – плакета и 20.000 денари
-
Охридска спортска легенда – за посебни заслуги во спортот – плакета и 20.000 денари
-
Спортист/ка со најдобар резултат во водени спортови – плакета и 20.000 денари
- Јасни критериуми и бодовен систем
Изборот ќе се врши врз основа на прецизно утврдени критериуми, дефинирани во Правилникот за „Најдобрите од спортот во општина Охрид“. Во предвид се земаат резултати остварени на државни, балкански, европски и светски првенства, како и учества на големи меѓународни натпреварувања.
За секоја категорија е предвиден бодовен систем, со корективни фактори за неолимписки спортови, јуниорски категории и спортисти со посебни потреби. Гласањето го врши комисија составена од седум члена, формирана со одлука на градоначалникот, а во случај на ист број бодови, наградата може да се подели.
- Крајниот збор го има комисијата
По завршување на рокот за пријавување и разгледување на пристигнатите кандидатури, комисијата ќе ја донесе конечната одлука, а резултатите ќе бидат официјално објавени на веб-страницата на Општина Охрид по свеченото доделување на наградите.
Со овој конкурс, Охрид уште еднаш испраќа порака дека спортот е важен дел од локалната заедница и дека успехот, трудот и посветеноста на спортистите заслужуваат јавно признание.
Повеќе информации за конкурсот за доделување награди и признанија во изборот на најуспешни спортистки и спортисти, тренер и спортска екипа на Охрид, за 2025 година можете да прочитате овде.
