Фудбалскиот клуб Пелистер го потврди враќањето на едно добро познато име – искусниот дефанзивец Кире Ристевски повторно ќе го носи зелено-белиот дрес во продолжението од сезоната во Првата македонска лига.
35-годишниот стопер, кој своите први фудбалски чекори ги направи токму во Битола, повторно се приклучува на матичниот клуб по долга интернационална кариера. Во изминатите години Ристевски настапуваше за повеќе клубови во домашното првенство, но и во странство, градејќи богато искуство во неколку европски шампионати.
Со своето знаење, мирнотија и лидерски квалитети, се очекува да биде важен фактор во битолската одбрана во пролетниот дел од сезоната. Ристевски веќе се стави на располагање на стручниот штаб и ќе патува со екипата на подготовките во Анталија, каде Пелистер ќе ја темпира формата за продолжението од шампионатот.
Покрај клупското искуство, Ристевски зад себе има и настапи за македонската репрезентација, вклучувајќи и учество на Европското првенство, што дополнително ја зголемува тежината на ова засилување за „пелистерци“.
Со овој потег, Пелистер јасно покажува дека сериозно пристапува кон предизвиците што следуваат и дека во пролетта ќе се потпира на проверени и искусни фудбалери.
